Me rastin e kësaj feste të bukur e simbolike që komuniteti shqiptar i Marylandit (Merilendit) po zhvillon sot, ju përshëndes dhe ju përgëzoj për këtë nismë me vlera në ruajtjen e gjuhës e të kulturës së popullit tonë.

Në radhë të parë, përgëzoj dhe falënderoj Akademinë Shqiptaro-Amerikane për gjithë aktivitetin e saj. Festa e Abetares është një tregues sinjifikativ i një nisme që ndihmon komunitetin shqiptar në Amerikë, një komunitet me traditë të gjatë, të ruajë e të kultivojë gjuhën amtare dhe kulturën kombëtare.

Abetaret që ju keni sot në dorë, janë një simbolikë e angazhimit tonë për t’ju ndihmuar e përkrahur, në ruajtjen dhe kultivimin e gjuhës amtare dhe kulturës kombëtare. Unë, në një festë të tillë, do t’ju uroja suksese edhe në nisma të tjera të ngjashme.

Emigrantët shqiptarë, kudo në botë, kanë nevojë shpirtërore të ushqehen me gjuhën, kulturën dhe traditat e kombit të tyre, në mënyrë që jo vetëm brezi i parë i ngulur e i përqendruar në një rajon kudoqoftë, por edhe brezi i ri, të mund të mbajë të gjallë krenarinë e të qenit shqiptar, duke ruajtur tiparet themelore kombëtare.

Qeveria shqiptare ka miratuar Strategjinë Kombëtare për Migracionin dhe Planin Kombëtar të Veprimit për Migracionin. Unë shpresoj se, me realizimi i këtij Plani Veprimi, i cili përmban aktivitete për arsimimin e nxënësve në diasporë dhe një koordinim midis Ministrisë sonë të Arsimit dhe Shkencës, Ministrisë së Jashtme dhe ministrive të tjera, do të rritet efikasiteti në drejtim të qëllimit tonë të përbashkët.

Në pamundësi për t’u kapur dorë për dore me ata vogëlushë që, përmes abetares mësuan shkrim e lexim shqip, jetoj me atmosferën festive që zotëron në mjedisin ku jeni mbledhur sot, duke i uruar vogëlushët për suksese të mëtejshme që të rriten e të bëhen të zot e të vlefshëm për veten, për prindërit e tyre dhe për kombin tonë.

Duke shpresuar që numri i nxënësve vitin e ardhshëm do të jetë dyfishuar dhe duke ju garantuar që mbështetja jonë do të jetë e vazhdueshme, i uroj dhe një herë suksese Akademisë Shqiptaro-Amerikane në misionin e saj fisnik.

GENC POLLO

MINISTER I ARSIMIT DHE I SHKENCES